Tað er neyvan bara hjá okkum, at høsnarungi ofta er eftir frá sunnudagsdøgurðanum. Við hesum rættinum fært tú brúkt restirnar og har við gjørt ein lættan og leskiligan rætt.

Høsnarungin og søteplini eru týdningamiklastu rávørurnar í hesum rættinum, men eigur tú ikki søtepli inni, sober til at verða kreativ/ur við øðrum tilfari. Minst bara altíð til at smakka til, áðrenn tú borðreiðir.

Tilfar til 4 persónar
4 søtepli
Olju
Restir av høsnarunga (svarar til 3-4 bringur)
3 pungar av hvítleyki
1-2 leykir
2 leim
200 g av svørtum bønum
Cherrytomatir
Frískt koriander
Frískt persillu
Krydda við salti, pipari, oregano og kili

Arbeiðsháttur

• Flys søteplini og sker tey í terningar
• Steik tey á pannuni við olju í 5 minuttir
• Sker høsnarungastykkini í smærri bitar og steik teir á pannuni saman við hvítleykinum
• Koyr síðani leykin og tomatirnar á pannuna og steik í 4 minuttir
• Til seinast koyrir tú kókaðu bønirnar á pannuna saman við koriander og persillu

Nú er bert eftir at smakka rættin til við kriddaríum, áðrenn tú borðreiðir.

Eg havi sjálv lyndi til at keypa alt ov nógvar bananir….og frukt í heila tikið. Áðrenn eg veit av, so hava tær ligið ov leingi, og enda tí alt ov ofta í skrellispannini. Synd, ha?

Nú havi eg funnið eina loysn, ið tit eisini kunnu fáa gagn av, so vit í felag kunnu sleppa undan hesum trupulleikan. Tað er so smart, at bananir kunnu frystast og so blíva til ein lekkran ís.

Tilfar til Bananís
Búnar bananir
Sjokulátu
Saft av appilsin
Vaniljusukur
Keks

Arbeiðsháttur
Sker nakrar búnar bananir í tunnar skivar, koyr tær í ein frystiposa og legg tær í frystiboksina í minst tveir tímar. Tilhoyr og tað, ið tú blandar uppí ísin, er eftir egnum ynski. Tað, ið eg havi brúkt er sera einfalt, tó vælsmakkandi.

Tak bananskivurnar úr frystiboksini og koyr tær í ein minihakkara saman við eitt sindur av appilsinsaft og vaniljusukri. Tá hetta er blivið til ein samlaðan ískendan konsistens, koyrir tú hakkaðu sjokulátuna í og rørur. Legg eitt lag av keks í botnin av hvørjum glasi og síðan ísin omanyvir. Pynta við onkrum, ið tú eigur inni s.s. frukt, keks, nøtur, róma ella góðgæti.

Tá vikan er um at halla og køliskápið treingir til at tømast, er altíð lekkurt við súpan. Tú kanst koyra alt grønmeti í, so sum hvíttkál, piparfrukt, aubergine, blómkál, gularót, epli, brokkoli og mangt annað.

Mest umráðandi er, at tú smakkar til við kryddaríum.

Til júst hesa súpanina er brokkoli høvuðstilfar.

Tilfar til tveir persónar
1 brokkoli
5 gularøtur
2 stórir leykir
5 fed av hvítleyki
4 epli
0,8-1 l av vatni
2 grønmetis bótarmolar
Salt
Pipar
Kili
Oregano

Tilhoyr
Steikt flesk, súrróma, snerktar breyðbitar o.a.

Sker grønmetið og eplini í smáar bitar og legg tað í eina stóra grýtu. Koyr vatnið og bótarmolarnir í og lat kóka í umleið 15-20 minuttir.

Brúka síðani stavblendaran, so grønmetið verður blendað og fær ein bleytan konsistens. Smakka til við kryddaríum. Um tú eigur eitt sindur av róma, so riggar tað væl at koyra í.

Nú er klárt at borðreiða.

Eigur tú restir frá døgurðanum í gjár? Kanska fleskasteik, oksakjøt, fisk ella høsnarunga? So kanst tú gera tær hendan leskiliga rættin, sum eisini er stuttligur at seta saman. Hesar summarrullurnar, sum hava uppruna úr Vietnam, eru blivnar sera vælumtóktar heima í Føroyum. Í høvðusheitum er ríspappírið tað einasta tilfarið, sum er neyðugt. Tú kanst fylla tær við alskyns tilfari. Fyri at fáa tann frískliga smakkin, sum eyðkennir summarrullurnar, fært tú brúk fyri kryddurtum sum myntu og basilikum. Eisini gevur ein frísk lime ein sera góðan smakk.

Tilfar til 8 summarrullur
1 pk ríspappír
2 høsnarungabringur
1 avokado
2 gularøtur
½ agurk
salatbløð
1-2 lime
frísk mynta
frískt basilikum
salt og pipar

Arbeiðsháttur
Steik høsnarungabringurnar á pannuni og sker grønmeti í avlangar álir.

Fyll kalt vatn á eina pannu og legg eitt ríspappír ísenn í vatnið. Lat tað liggja í 1-2 minuttir og tak tað síðani úr og legg tað á eitt skeribretti.

Vit ynskja at síggja hvat er í, tá ið hon er rullað, og tí leggja vit tilfarið pent eftir rekkju.

Byrja við at leggja salatbløðini á eina rekkju tvørturum, ca. 2 cm frá ovasta kantinum. Legg síðani høsnarungabitarnar beint niðanfyri. Síðani leggur tú restina av grønmetinum í banar oman eftir. Trýst eitt sindur av lime omanyvir og stroy
bløð av myntu og basilikum oman yvir og enda við salti og pipari.

Nú skal ríspappírið rullast. Verð varin tá tú tekur í pappírið, tí tað kann lætt skrædna.

Legg fyrst kantin av ríspappírinum omanyvir salatbløðini, og síðani tekur tú kantarnar í síðuni og foldar teir innyvir  so onki dettur úr í síðunum. Síðani rullar tú allan vegin oman yvir restina av tilfarinum. Nú er alt tað leskiliga tilfarið savnað inni í ríspappírinum. Sker rulluna í tveir partar og borðreið 🙂

Tað hóskar seg væl, at dyppa summarrullurnar í soya ella søta chilisós.

Lasanja er ein fastur táttur heima hjá okkum, tá ið køliskápið skal tømast. Tað eru ongar reglur fyri, hvat kann og hvat ikki kann fara í. Alt slag av grønmeti, salati og osti kann brúkast. Nakað av grundleggjandi tilfarinum má ein brúka, men til fylluna kanst tú brúka júst tað, tær lystir. Um tú hevur havt pitabreyð til nátturða dagin fyri, so kunnu til dømis allar restirnar fara í lasanjuna dagin eftir. Við at koyra grønmeti í lasanjuna, gerst mongdin av mati eisini størri, og tí er kanska eisini okkurt eftir til matpakkan dagin eftir.

Tilfar til 4-6 fólk
400 g malið neytakjøt
3 gularøtur
2 leykir
3 pungar av hvítleyki
1 lógva av brokkoli
1 lógva av blómkáli
1 lógva av soppum
1 piparfrukt
2 dósir av hakkaðum tomatum
Kryddarí – oregano, kili, salt og pipar
1 pk bechamelsós/morneysós
Lasanjuplátur
Rivnan ost

Arbeiðsháttur
Set ovnin á 180 stig.

Tað er ymiskt, hvat man dámar, og tí kann grønmetið antin skerast grovt ella koyrast í ein minihakkara, so tað blandast við kjøtinum.

Byrja við at brúnka leykin og hvítleykin og koyr síðani kjøtið saman við. Síðani skal alt tað grøna í grýtuna, og lat tað steikja eina løtu. Krydda við oregano, kili, salti og pipari. Tú kanst smakka til við øðrum, sum tú plagar at brúka, tí tað er umráðandi, at nokk av smakki kemur í. Koyr síðani hakkaðu tomatirnar í. Um tú ynskir ein vátari konsistens, kanst tú koyra eitt sindur av vatni ella mjólk í. Um tú eigur eitt sindur av róma, so gevur tað eisini ein góðan, rundan smakk.

Koyr nú skiftivís kjøtbland, bechamelsós og lasanjuplátur í eitt eldfast fat og síðani rivna ostin ovast. Set fatið mitt í ovnin í 45 minuttir.

Lasanjan kann borðreiðast saman við salati og breyði.